લાલ બહાદુરની બહાદુરી

એક વખત લખનૌમાં ભારત-પાકિસ્તાન વચ્ચે ટેસ્ટ મેચ ચાલતી હતી. કોઈપણ ટીમ હારે કે જીતે પણ ત્યારે સ્ટેડિયમના પ્રેક્ષકો ધાંધલ-ધમાલ કરવાના જ હતા તેવી ગણત્રી હતી. એ વખતના રાજ્યના ગૃહપ્રધાન સ્વ. લાલબહાદુર શાસ્ત્રીએ મેદાનની બાઉન્ડ્રી લાઈનની બહાર, સ્ટેડીયમની જાળી પાસે ગ્રાઉન્ડ પર પોલીસ હવાલદારો ગોઠવી દીધેલા. એ સમયે લખનૌની પોલીસનો યુનિફોર્મ હતો ખાખી ડ્રેસ અને માથે લાલ પાઘડી. શાસ્ત્રીજી તો ખેલદીલ પ્રધાન હતા. પહેલા દિવસની મેચ જોવા સ્ટેડીયમના ઉપરના માળના પેવેલીયનમાં બેસી ગયા હતા. લંચ ટાઈમ વખતે શાસ્ત્રીજી હોલમાં બધા ક્રિકેટરોને મળવા આવ્યા તે વખતે ચાર-પાંચ યુવાનો શાસ્ત્રીજી પાસે આવ્યા અને કહ્યું કે, ''સર, લાલ પાઘડીવાળાને કારણે અમારે મેચ જોવામાં ખલેલ પડે છે.'' શાસ્ત્રીજીએ કહ્યું, 'ભલે, આવતીકાલે લાલ પાઘડી હટી જશે, હું સુચના આપી દઈશ.' બીજા દિવસની મેચ શરૃ થઈ ત્યારે પણ પોલીસ હવાલદારો બાઉન્ડ્રી આસપાસ ગોઠવાઈ ગયા હતા. યુવાનોને આશ્રર્ય થયું. ફરી લંચ વખતે તેઓ શાસ્ત્રીજીને મળ્યા અને કહ્યું કે, 'સાહેબ, હજી હવાલદારો બાઉન્ડ્રી પરથી હઠયા નથી. આપે તો કાલે તેઓને સૂચના આપવાનું કહ્યું હતું.' ત્યારે શાસ્ત્રીજી બોલ્યા કે ''આપણે શું વાત થઈ હતી? લાલ પાઘડી હટી જશે. જુઓ આજે એકેય લાલ પાઘડી પહેરીને આવ્યા નથી. બધા હવાલદાર ખાખી પાઘડી પહેરીને આવ્યા છે.'' શાસ્ત્રીજીની મુત્સદ્દીગીરી અનુભવીને યુવાનો શરમાઈને હસતાં હસતાં ચાલ્યા ગયા. આવા હતા લાલ 'બહાદુર' શાસ્ત્રી જેઓ ભારતના વડાપ્રધાન પણ રહી ચુક્યા હતા.